Abduraxman Qahar 1936-yili 11- ayda ghulja shehiride qol hünerwen ailiside tughulghan. 1945-Yilidin 1952-yilighiche bashlanghuch we ottura mektep terbiyisini ghulja shehiride alghan. 1952-Yili 9-ayda ghuljidiki exmetjan qasimi namidiki bilim yurtigha kirip bir yil oqughandin kéyin, 1953-yili 9-ayda sabiq shinjang inistitutining til-edebiyat fakultétida oqushqa kirgen we 1956-yili oqush püttürgendin kéyin ürümchi we ghuljilarda maarip saheside ishligen, kéyin ili pédagogika inistitoti til-edebiyat fakultétigha yötkilip oqutquchiliq qilghan. 1988-Yilidin étibaren shinjang yazghuchilar jemiyitining kespiy yazghuchisi bolup ishleshke bashlighan Abduraxman Qahar, döletlik 2- derijilik kespiy yazghuchi, junggo yazghuchilar jemiyitining ezasi, junggo az sanliq millet yazghuchiliri ilmiy jemiyitining heyet ezasi idi. Pishqedem Uyghur yazghuchisi Abduraxman Qahar 2020-yili 12-dékabir küni 85 yéshida ürümchide wapat bolghan.
Abduraxman Qahar edebiyat sahesige 50- yillarning otturilirida shéir ijadiyiti bilen kirip kelgen we shu yillarda bir qisim shéirlarni yézip élan qildurghan. Kéynche, u mexsus proza ijadiyiti bilen shughullinip, «ana wesiyiti», «emet haji», «déhqan sazende» qatarliq hékayilarni yazghan, 70-yillarning axirliridin tartip bir türküm yirik eserlerni ijad qilip, prozichiliq saheside xéli chong netijilerge érishken. Uning «ili dolqunliri» (ikki tomluq), «hayat siri», «köngül» we «awat sheherning yéngi puqrasi» namliq romanliri; «kechür, méni nazaket», «bext», «ah, yashliqim» qatarliq powéstliri bolup, yigirme parchige yéqin kitabi neshir qilinghan. Uning «awat sheherning yéngi puqrasi» namliq romani memliketlik az sanliq millet edebiy eserlirini bahalashta «tulpar» mukapatigha érishken.
