Fotograf we xettat Ablikim Emet 1963-yili 5-ayning 1-küni wetinimizdiki bayingholin mongghul aptonum oblastining xoshut nahiyeside tughulghan. Bashlanghuch we ottura mekteplerni xoshut nahiyeside oqughan. Aliy téxnikomni püttürgen. Ablikim Emet kichikidinla güzel-senetke, resim sizish we hösn xet yézishqa shtiyaq baghlighan bolup, özlükidin tiriship ögünüp kéyinki waqitlarda Uyghur diyarida neshir qilinghan nopuzluq gézit-zhurnallarda köpligen hösn xet we foto süret eserlirini élan qilghan. Ablikim Emet pewquladde talantliq fotograf, uning süretke alghan Uyghur rayonining menzirisi, deryaliri, taghliri, qedimki derexliri we peqet tebietla yaritalaydighan rengdarliqni eks ettürgen eserliri uning wetini, tarix, medeniyet, enene we riwayetlirini tentene qilidu we shundaqla uning séghinishi ipadilinidu. Uning eng toghra peytni tutalighan bu foto-süretlerdiki obrazlarning mukemmelliki, fotografning küzitishchanliqidiki xasliq, özgichilik hemishe bizni heyran qalduridu.
U 1990- yilidin bashlap foto süretchilik kespini ögünishke kirishken. U ana yurtimizning bipayan séhirlik qoynidiki tilsimlardin güzel durdanilarni qézip, yoqiri bediiylikke ige futo süret eserlirini apiride qilip güzellikke teshna qelblerni lerzige salghan stidatliq fotograf. Uning «adem we tebiet» témisidiki bir qatar eserliri mol tesewwurgha, mukemmel qurulmigha, körkem nur senitige, sirliq ipadilesh küchige ige bolup, bediiy senetning julaliq göherliri hésablinidu. U gahida bushluqta lachindek perwaz qilip, güzel wadilarni süretke tartqan bolsa bezide méhri atesh zéminni baghashlap, kishining qelbini lal qilidighan julaliq kartinilarni xatirileydu. Tengritagh oghul-qizlirining jesor, nazaketlik qiyapitini yoqiri bediiy maharette ipadilep güzellik babida renggareng güllerni échilduridu. U Uyghur futografiye seniti saheside yüksek pellini yaritip Uyghur xelqi qelbidin orun alghan senetkardur .
2008-Yili 3-ayda béyjingda ötküzülgen «dunya suluq yerni qoghdash» témisidiki futo süret körgezmiside «suluq yerdiki séhérlik xet», «qanasqa küz keldi» namliq ikki parche futu süret esiri 3-derijilik mukapatqa érishken. 2008-Yili 12-ayda Uyghur rayonluq 15-nöwetlik futo süret körgezmiside «egim-egim künes deryasi», «yalqun» namliq futo süret esiri mis médalgha érishken. 2010-Yili 12-ayda Uyghur rayoni boyiche ötküzülgen «télgraf longqisi» foto süret körgezmiside «inaq yer shari» namliq esiri altun mukapatqa érishken. 2010-Yili 6-ayda shangxeyde ötküzülgen 10- nöwetlik shangxey xelqaraliq futo süret körgezmiside «jelpkar suluq yer» namliq ikki parche esiri munewwer eser mukapatigha érishken. 2011-Yili 12-ayda Uyghur rayoni boyiche ötküzülgen «güzel tebiet» futo süret körgezmiside «suluq yerdiki séhirlik xet» namliq esiri 2-derijilik mukapatqa érishken. 2012-Yili 9-ayda amérika dölet jughrapiyisi zhornili orunlashturghan junggo rayoni futo süret musabiqiside «tebiiy qum yéza» namliq esiri tallinish mukapatigha érishken. 2013-Yili 4-ayda «suluq yerdiki séhirlik xet» namliq esiri Uyghur rayonluq edebiyat-senet sahesidiki eng katta mukapat 4-nöwetlik «tengritagh edebiyat-senet mukapati» gha érishken.
