«ئاداشماق» پېئىلىنىڭ مەجبۇرىي دەرىجىسى: نىشاندىن ئاداشتۇرماق.

ئۆزئارا ئاداش، ئاغىنە: ئاداش-ئاداش بولايلى، بىر نان تاپساق تەڭ يەيلى.

ئىسىم ①دوست؛ ئاغىنە، بۇرادەر: ئاداش بولماق. ②يار، ئاشنا: كۆردۈڭمۇ بۇ باشىمنى، كۆزۈمدىكى ياشىمنى، ئۈچ كۈن بولدى كۆرمەيمەن، قارا قاش ئاداشىمنى.

ئىسىم. دىئالېكت سۆز. ئاتا-ئانىلاردىن تەۋەررۈك بولۇپ قېلىپ قالغان نەرسىلەر.

«ئادىماق» پېئىلىنىڭ مەجبۇرىي دەرىجىسى: ئېچىشماق، ئاچچىقلاشماق، زەرداپلاشماق: ئۇنىڭ بۇ غەلىبىلىرىگە چىدىمىغان ئەسئەتنىڭ ئىچى ئاداپ كېتىۋاتاتتى.

ئىسىم [پارسچە] ئۇن، كېپەك قاتارلىقلاردىن مەخسۇس ئۆي ھايۋانلىرىغا ئېتىپ بېرىلىدىغان مەخسۇس سۇيۇق ئۇماچ.

كۆپىنچە «بولماق» ياردەمچى پېئىلى بىلەن كېلىپ «ئالاقە-مۇناسىۋەتنى ئۈزۈل-كېسىل ئۈزمەك، توختاتماق» دېگەندەك مەنىلەرنى بىلدۈرىدۇ: بىز ئۇنىڭ بىلەن ئادا-جۇدا بولدۇق.

[ئەرەبچە] ①ئىسىم. ئىش-ھەرىكەت، ۋەقە-ھادىسىنىڭ ئاخىرى، تاماملىنىش ئىجراسى: ۋەزىپە ئادا بولماق.＊بىز بۇرچىمىزنى ئادا قىلدۇق. ②سۈپەت. پاكىز، تازا: ناھىيىلىك ئاشلىق ئىدارىسىدىكىلەر: «بۇغدىيىڭ تازا ئەمەسكەن» دەپ باشقىدىن ئادا قىلدۇردى.

ئىسىم <زوئولوگىيە> بىر خىل قۇش، ئەركىكىنىڭ تەن ئۇزۇنلۇقى تەخمىنەن 33 سانتىمېتىر، يازلىق پەي تۈكلىرىنىڭ رەڭگى چىپار بولۇپ دۈمبە، قۇيرۇق تەرەپلىرى ئاق ئالا بولىدۇ؛ چىشىسىنىڭ باش ۋە بويۇن قىسىملىرى قارا، قالغان قىسىملىرى سارغۇچ رەڭلىك، قوڭۇر ئالىسى بار، ئۇزۇنغا ئۇچالمايدۇ؛ ئېگىز تاغلاردا ئۆسۈملۈكلەرنىڭ نوتىسىنى، ئۇرۇقلىرىنى ۋە ھاشاراتلارنى يەپ ياشايدۇ؛ خېيلۇڭجياڭدا، شىنجاڭنىڭ ئالتاي تاغلىرىدا تېپىلىدۇ.

«ئاخۇن» سۆزىنىڭ بىرىنچى شەخس ئىگىلىك قوشۇمچىسى بىلەن كەلگەن ھۆرمەت شەكلى: خوش ئاخۇنۇم، گەپ سىلىدىن بولسۇن.

ئىسىم [ئاخۇن+ياغلىق] <بوتانىكا> ئۆرۈكنىڭ بىر تۈرى، تاشقى پوستى ئاقۇچ، بىرئاز تۈكلۈك بولىدۇ.

ئىسىم <دىن> ئاخۇنلارنىڭ دىنىي تەربىيە ۋە تەرغىبات بىلەن شۇغۇللىنىش ئىشى: ئاخۇنلۇق قىلماق.