Фотограф вә хәттат Абликим Әмәт 1963-йили 5-айниң 1-күни вәтинимиздики байинғолин моңғул аптонум областиниң хошут наһийәсидә туғулған. Башланғуч вә оттура мәктәпләрни хошут наһийәсидә оқуған. Алий техникомни пүттүргән. Абликим Әмәт кичикидинла гүзәл-сәнәткә, рәсим сизиш вә һөсн хәт йезишқа штийақ бағлиған болуп, өзлүкидин тиришип өгүнүп кейинки вақитларда Уйғур дийарида нәшир қилинған нопузлуқ гезит-журналларда көплигән һөсн хәт вә фото сүрәт әсәрлирини елан қилған. Абликим Әмәт пәвқуладдә талантлиқ фотограф, униң сүрәткә алған Уйғур райониниң мәнзириси, дәрйалири, тағлири, қәдимки дәрәхлири вә пәқәт тәбиәтла йариталайдиған рәңдарлиқни әкс әттүргән әсәрлири униң вәтини, тарих, мәдәнийәт, әнәнә вә ривайәтлирини тәнтәнә қилиду вә шундақла униң сеғиниши ипадилиниду. Униң әң тоғра пәйтни туталиған бу фото-сүрәтләрдики образларниң мукәммәллики, фотографниң күзитишчанлиқидики хаслиқ, өзгичилик һәмишә бизни һәйран қалдуриду.
У 1990- йилидин башлап фото сүрәтчилик кәспини өгүнишкә киришкән. У ана йуртимизниң бипайан сеһирлик қойнидики тилсимлардин гүзәл дурданиларни қезип, йоқири бәдиийликкә игә футо сүрәт әсәрлирини апиридә қилип гүзәлликкә тәшна қәлбләрни ләрзигә салған стидатлиқ фотограф. Униң «адәм вә тәбиәт» темисидики бир қатар әсәрлири мол тәсәввурға, мукәммәл қурулмиға, көркәм нур сәнитигә, сирлиқ ипадиләш күчигә игә болуп, бәдиий сәнәтниң җулалиқ гөһәрлири һесаблиниду. У гаһида бушлуқта лачиндәк пәрваз қилип, гүзәл вадиларни сүрәткә тартқан болса бәзидә меһри атәш земинни бағашлап, кишиниң қәлбини лал қилидиған җулалиқ картиниларни хатириләйду. Тәңритағ оғул-қизлириниң җәсор, назакәтлик қийапитини йоқири бәдиий маһарәттә ипадиләп гүзәллик бабида рәңгарәң гүлләрни ечилдуриду. У Уйғур футографийә сәнити саһәсидә йүксәк пәллини йаритип Уйғур хәлқи қәлбидин орун алған сәнәткардур .
2008-Йили 3-айда бейҗиңда өткүзүлгән «дунйа сулуқ йәрни қоғдаш» темисидики футо сүрәт көргәзмисидә «сулуқ йәрдики сеһерлик хәт», «қанасқа күз кәлди» намлиқ икки парчә футу сүрәт әсири 3-дәриҗилик мукапатқа еришкән. 2008-Йили 12-айда Уйғур районлуқ 15-нөвәтлик футо сүрәт көргәзмисидә «әгим-әгим күнәс дәрйаси», «йалқун» намлиқ футо сүрәт әсири мис медалға еришкән. 2010-Йили 12-айда Уйғур райони бойичә өткүзүлгән «телграф лоңқиси» фото сүрәт көргәзмисидә «инақ йәр шари» намлиқ әсири алтун мукапатқа еришкән. 2010-Йили 6-айда шаңхәйдә өткүзүлгән 10- нөвәтлик шаңхәй хәлқаралиқ футо сүрәт көргәзмисидә «җәлпкар сулуқ йәр» намлиқ икки парчә әсири мунәввәр әсәр мукапатиға еришкән. 2011-Йили 12-айда Уйғур райони бойичә өткүзүлгән «гүзәл тәбиәт» футо сүрәт көргәзмисидә «сулуқ йәрдики сеһирлик хәт» намлиқ әсири 2-дәриҗилик мукапатқа еришкән. 2012-Йили 9-айда америка дөләт җуғрапийиси жорнили орунлаштурған җуңго райони футо сүрәт мусабиқисидә «тәбиий қум йеза» намлиқ әсири таллиниш мукапатиға еришкән. 2013-Йили 4-айда «сулуқ йәрдики сеһирлик хәт» намлиқ әсири Уйғур районлуқ әдәбийат-сәнәт саһәсидики әң катта мукапат 4-нөвәтлик «тәңритағ әдәбийат-сәнәт мукапати» ға еришкән.
